லண்டன் திரையில் “மயக்கம் என்ன?”

“மயக்கம் என்ன” திரைப்படத்தின் நேரடி லண்டன் ரிப்போர்ட்...

மயக்கம் என்ன? திரைப்படம் ஓடும் தியேட்டரின் வலைத்தளத்திற்குச் சென்று படத்தின் Age Certificateஐ முதலில் பார்த்துக் கொண்டேன். வழமை போல் 12A தான். 8:30 படத்திற்கு 7:45ற்கே போய்ச் சேர்ந்து விட்டோம். சீக்கிரம் போய் விட்டோமே என்று கவலைப் பட்டுக்கொண்டு அரங்கிற்குள் போனால் ஏற்கனவே பாதி நிரம்பியிருந்தது. 8 மணிக்குள் அரங்கமே நிறம்பிவிட்டது. படத்தை ஆரம்பிக்கச் சொல்லி ஒரே விசில் சத்தம். வந்திருந்தவர்கள் நடந்ததைப் பார்த்தால் தமிழ் சினிமாவிற்கே இனி தடை சொல்லிவிடுவார்களோ என்றிருந்தது. ஒரு வழியாக சரியான நேரத்திற்கு படம் துவங்கிவிட்டது. House Full என்பார்கள். ஆனால் உட்கார ஒரு இருக்கை கூட இல்லாமல் நிரம்பியதை பல ஆண்டுகள் கழித்துப் பார்த்தேன்.

கதையைப் பற்றி எல்லாத் தளத்திலும் அலசி ஆராய்ந்து விட்டார்கள். அதனால் நான் எதுவும் சொல்லப் போவதில்லை. பாடல்கள் அனைத்தையும் அண்ணன் தம்பி இருவருமே எழுதியிருக்கிறார்கள். நல்ல முயற்சி. வரிகளும் நன்றாகவே வந்திருக்கு. வழமை போல் பிரகாஷின் இசையில் பாடல்கள் எல்லாம் இனிமை. ராம்ஜியின் ஒளிப்பதிவு மனதை என்னமோ செய்து விட்டது. குறிப்பாக பாட்டியை தனுஷ் படம் பிடிக்கும் இடம்... காவியமாக அமைந்து விட்டது. இயக்குனருக்கு ஒரு சபாஷ்.

 

குருவி தலையில் பனங்காயாய் இப்படியொரு கனமான பாத்திரத்தை ரிச்சாவின் தலையில் ஏற்றியிருக்கும் செல்வராகவனின் நம்பிக்கை வீண் போகவில்லை. தேர்ந்த நடிகையைப் போல் எளிதாக செய்து முடித்து விட்டார். வெறும் பார்பி டாலாக இல்லாமல் தமிழ் சினிமாவிற்கு நல்ல ஒரு நடிகையின் வருகை என சந்தோஷப்படலாம். அதிலும் அழகிலும் சலைத்தவரில்லை.

இவ்வளவு அழகான கதையை எழுதிய இயக்குனர், அப்படியே கொஞ்சம் திரைக்கதையையும் வேகப்படுத்தியிருந்தால் இன்னும் எல்லாத் தர மக்களின் ரசணையையும் திருப்திப் படுத்தியிருக்கலாம் என்று நினைக்கிறேன்.

ஒவ்வொரு வெற்றி பெற்ற மனிதனுக்குப் பின்னாலும் ஒரு பெண் இருப்பாள் என்பதை மீண்டும் மக்கள் நினைவிற்குக் கொண்டு வந்ததற்காக செல்வராகவன் குழுவினருக்கு வாழ்த்துக்கள்.  

“மயக்கம் என்ன?” - சரக்குப் பத்தாது...